Like this:

يمر الوقت ويمضي بنا الزمن وفجأة نجد أنفسنا في خريف العمر ..كبر الأبناء وكل يعيش حياته سواء هنا في المنزل أو منزله الخاص …وهي… رفيقة العمر لازلت هي سلواي في هذه الدنيا ولا أطيق العيش سواها …لم تقصر معي يوما بالرغم من تذمري الدائم وشكواي ليل نهار ؛فهي تعلم في قرارة نفسها بأن كل ذلك مجرد كلام لا أقصد من وراءه شيء سوى تمضية الوقت؛فلم يعد هناك ما يشغلني سوى شاشة التلفزيون وبرامج لا تستهوي كهل مثلي………
” يبه وين ربعك ؟ وين الناس اللي تعرفهم من الشغل وغيره؟ ليش ما تزورهم ويزورنك أو تروحون القهوة مع بعض!!؟”
وقعت علىَ كلماته كالماء البارد فجمدتني لوهلة ولسان حالي يقول ياليت عندي لو صديق واحد بس ماكان هذا حالي ..
“يبه أكلمك وين رحت ؟”
أطلقت زفرة ألم قبل أن أجيبه :
- لو كان بيدي خليت الزمن يرجع لورا شوي وخليتني مع الناس اللي أعرفهم واللي أحس أنهم بيكونون معاي على قلب بس للأسف يا ولدي طلعت غبي وأناني كنت ما أعرف أخلي الناس تظل معاي كنت أبعدهم عني بتصرفاتي الطايشة والغير مسئولة وما في حد يقدر يتحمل انسان نفسي في ذاك الوقت واللي ارافجه اليوم باجر اخليه واروح حق غيره …..أنا اللي سويت في عمري جذي ما خليت لي صاحب ما كنت اصدق اللي يقولونه لي عن الصديق وقت الضيق وأنه ييجيني يوم ألاقي فيه نفسي بروحي وما في راح يسأل عني وكنت أقول ما راح أحتاج لحد وانا عندي كل شي..بس اليوم عرفت الواحد في السن يحتاج حق رفيج يحس فيه ويمر باللي يمر فيه يشتكون حق بعض، الزوجة والعيال مو كل شي ولا يقدرون يعطونك كل شي …
- اسمحلي لي يا بوي انا مستعد اسوي اي شي انت تبيه بس ما شوفك ب..
قاطعته والعبرة تخنقني:
- أعرف يا ولدي أنك مو مقصر وأمك بعد الله يخليها لي ما في يوم اشتكت وقصرت معاي بس أنا حبيت اطلع اللي في خاطري واسولف معاك شوي…
طبع قبلة على رأسي قبل أن يرن هاتفه ويتركني ليرد عليه …
امسكت يده قبل أن يغادرني
“أقول …إذا عندك صديق لا تفرط فيه ..وبدل الواحد خلهم عشرة والدنيا ترى ما تسوى بلاهم سمعتني زين..؟”
ربت على كتفي وهو يقول ضاحكاً:
- لا تخاف على ولدك يا أبوي عندي مو عشرة بس الا درزن وزياده بعد…أشوفك على خير..”
تركني ورحل ……….مسحت دمعة انحدرت رغماً عني جاهدت ألا يراها ولدي العزيز وعدت أقلب المحطات أبحث عما أشاهده قبل أن يداعب النوم أجفاني …….!